वर्षासँगै बागलुङका मुख्य सडक अवरुद्ध

असारको अन्तिम सातासम्म पर्याप्त वर्षा नहुँदा किसानले अपेक्षाअनुसार धान रोप्न पाएका थिएनन्। तर शनिबारदेखि परेको अविरल वर्षासँगै बागलुङका मुख्य सडकमा पहिरो खस्न थालेपछि यातायात प्रभावित हुन थालेको छ। कालीगण्डकी करिडोरको बागलुङ खण्ड तथा बुर्तिवाङ–ढोरपाटन सडकमा विभिन्न स्थानमा पहिरो खस्दा सडक अवरुद्ध हुने क्रम सुरु भएको छ।

जैमिनी नगरपालिका–७ जैदी र वडा नं. ८ छिस्तीको सिमानास्थित बेलबगरमा लेदोसहितको पहिरो खस्दा करिब आठ घण्टा सडक अवरुद्ध भएको थियो। प्रहरी, स्थानीयवासी र स्काभेटरको सहयोगमा पहिरो हटाएपछि सडक पुनः सञ्चालनमा आएको थियो।

कालीगण्डकी करिडोर कालोपत्र भएपछि बागलुङ, म्याग्दी र मुस्ताङ भ्रमणमा जाने पर्यटकले यस सडकको व्यापक प्रयोग गर्दै आएका छन्। गुल्मी, पाल्पा र बुटवल हुँदै यात्रा गर्ने भारतीय भक्तजन र पर्यटकका लागि पनि यो सडक प्रमुख मार्ग बनेको छ।

जैमिनी नगरपालिकाका उपप्रमुख हरिहर शर्माले कमजोर भू–बनोटका कारण वर्षायाममा बेलबगर क्षेत्रमा बारम्बार पहिरो खस्ने र यात्रुलाई जोखिम तथा सास्ती हुने गरेको बताए ।

यस्तै, कालीगण्डकी करिडोर र बागलुङ–कुश्मीसेरा सडकको दब्ल्याङ क्षेत्रमा विगत छ वर्षदेखि निरन्तर पहिरो खस्दै आएको छ। सामान्य वर्षा हुँदा पनि सडक अवरुद्ध हुने गरेकाले जैमिनी नगरपालिका र बरेङ गाउँपालिकाका बासिन्दाले हरेक वर्ष सास्ती खेप्दै आएका छन्।

२०७६ सालदेखि सक्रिय रहेको उक्त पहिरोका कारण वर्षायाममा सडक पटक–पटक अवरुद्ध हुने र कतिपय अवस्थामा महिनौँसम्म यातायात ठप्प हुने गरेको छ। पहिरो नियन्त्रणका लागि बागलुङ नगरपालिका र जैमिनी नगरपालिकाले विभिन्न चरणमा लगानी गरे पनि दिगो समाधान हुन सकेको छैन। गण्डकी प्रदेश सरकारले विनियोजन गरेको तीन करोड रुपियाँको बजेटबाट समस्या समाधान गर्ने योजना पनि प्रभावकारी रूपमा कार्यान्वयन हुन सकेको छैन।

प्रारम्भिक अध्ययन प्रतिवेदनअनुसार पहिरो नियन्त्रणका लागि पहिलो चरणमा पानीको उचित व्यवस्थापन गर्नुपर्ने र त्यसपछि मात्र सडक संरचना निर्माण गर्नुपर्ने उल्लेख छ। दोस्रो चरणमा कम्तीमा १६ मिटर गहिराइसम्म खम्बा गाडेर चट्टानसम्म पुर्‍याएपछि मात्र दीर्घकालीन रूपमा पहिरो नियन्त्रण गर्न सकिने प्रतिवेदनमा उल्लेख गरिएको छ। यसका लागि करोडौँ रुपियाँ खर्च लाग्ने अनुमान गरिएको छ।

जिल्ला प्रहरी कार्यालय बागलुङका प्रहरी नायब उपरीक्षक रामेश्वर त्वातीले बेलबगर र दब्ल्याङमा पटक–पटक पहिरो खस्दा यात्रुले सास्ती भोग्नुका साथै समयमै गन्तव्यमा पुग्न नसक्ने अवस्था रहेको बताए । पर्याप्त उपकरण र जनशक्ति अभाव तथा निरन्तर वर्षाका कारण सडक खुलाउन अपेक्षाभन्दा बढी समय लाग्ने उनको भनाइ छ।

यता, वर्षायाममा सालझण्डी–ढोरपाटन सडकको फल्लेघरभन्दा माथिल्लो क्षेत्रमा पनि लेदोसहितको पहिरो खस्ने क्रम दोहोरिँदै आएको छ। निर्माणाधीन सालझण्डी–ढोरपाटन सडक समयमै सम्पन्न नहुँदा यात्रुले हरेक वर्ष सास्ती खेप्नुपरेको ढोरपाटन नगरपालिकाका कार्यवाहक नगरप्रमुख धनबहादुर कायतले बताए ।

उहाँका अनुसार नगरपालिकाले आफ्नै डोजर प्रयोग गरेर सडक सञ्चालनमा ल्याउने प्रयास गर्दै आएको छ। १६ वर्षदेखि निर्माणाधीन रहेको सालझण्डी–ढोरपाटन सडकको काम सम्पन्न हुन नसक्दा पर्यटकीय मौसममा ढोरपाटन आउने पर्यटकसमेत पहिरो र जीर्ण सडकका कारण समस्यामा पर्ने गरेका छन्।