रूसको पछिल्लो मिसाइल आक्रमणमा कीभमा ११ जनाको मृत्यु भएपछि युक्रेनी राष्ट्रपति भोलोदिमिर जेलेन्स्कीले थप पेट्रियट मिसाइलको माग गरेका छन्। आइतबार रातिको मिसाइल आक्रमणमा युक्रेनको राजधानी कीभमा कम्तीमा ११ जनाको मृत्यु र ४६ जना घाइते भएका छन्। त्यसपछि जेलेन्स्कीले थप अमेरिका लगायत पश्चिमा राष्ट्रसँग पेट्रियट रक्षात्मक मिसाइलका लागि आह्वान गरेका छन्।
‘विश्व, विशेष गरी संयुक्त राज्य अमेरिका र हाम्रा युरोपेली साझेदारहरू, टर्कीमा हुने नेटो शिखर सम्मेलनबाट हाम्रो वायु रक्षाको समर्थनमा बलियो निर्णयका साथ अघि बढ्नु एकदमै महत्त्वपूर्ण छ,’ जेलेन्स्कीले सोमबार सामाजिक संजाल एक्समा लेखेका छन्। जेलेन्स्कीले आइतबार चेतावनी दिँदै गुप्तचर निकायहरूले यस हप्ता टर्कीको अंकारामा हुने नेटो शिखर सम्मेलन अघि रूसले युक्रेनमा अर्को ठुलो आक्रमणको तयारी गरिरहेको संकेत गरेको बताएका थिए।
उनले भने, ‘जबसम्म पेट्रियट मिसाइलहरू हाम्रा सहयोगीहरूको भण्डारमा सीमित रहन्छन्, तबसम्म रूसले आवासीय भवनहरूलाई ध्वस्त गरिरहन मात्र प्रोत्साहन पाउनेछ।’ पश्चिमी समर्थनले मात्र ‘साधारण मानिसहरूको जीवनको रक्षा’ ग्यारेन्टी गर्न सक्ने उनले थपे। ‘यो आतंकलाई रोक्न संयुक्त राज्य अमेरिका र युरोपसँग पर्याप्त शक्ति छ,’ जेलेन्स्कीले भने।
कीभका मेयर भिटाली क्लिट्स्कोले रूसको रातभरिको आक्रमणले चारवटा जिल्लाहरू ध्वस्त पारेको बताएका छन्। सबैभन्दा बढी क्षति भएको पोडिल्स्की जिल्लामा धेरै उच्च गगनचुम्बी आवासीय भवनहरूमा क्षति पुगेको उनले जानकारी दिए।
घाइते भएका ४६ जनामध्ये तीन जना बालबालिका रहेको क्लिट्स्कोले टेलिग्राममा लेखेका छन् र मंगलबारका दिन पीडितहरूका लागि शोक दिवस घोषणा गरेका छन्। सोमबार बिहान पनि आपत्कालीन टोलीहरूले भग्नावशेषमा जीवितहरूको खोजी जारी राखेकाले हताहत हुनेको संख्या अझै बढ्न सक्ने सम्भावना छ।
गत हप्ता मात्रै रूसी मिसाइल र ड्रोन आक्रमणको अर्को लहरले १३ जनाको ज्यान लिएको थियो भने ८० भन्दा बढी घाइते भएका थिए। रूसी राष्ट्रपति भ्लादिमिर पुटिनले अमेरिकी राष्ट्रपति डोनाल्ड ट्रम्पसँग फोन वार्ता गरेको दुई दिन पछि आइतबारको पछिल्लो हमला भएको हो।
