नुवाकोट जिल्लाको ककनी गाउँपालिका–५ तथा शिवपुरी गाउँपालिका–५ मा अवस्थित लौके झरना पछिल्लो समय प्रकृति प्रेमी, हाइकिङ तथा फोटोग्राफीमा रुचि राख्नेहरूका लागि आकर्षक गन्तव्य बन्दै गएको छ। काठमाडौं उपत्यकाबाट छोटो दूरीमा पुग्न सकिने भएकाले साथीभाइ तथा परिवारसँग एक दिनको भ्रमण, पिकनिक र प्रकृतिसँग रमाउनेहरूका लागि यो ठाउँ रोजाइमा पर्न थालेको हो।
काठमाडौं उपत्यकाबाट करिब दुई घण्टाको यात्रामा पुग्न सकिने लौके झरना विशेषगरी मनसुन याममा आकर्षणको केन्द्र बन्ने गरेको छ। वर्षायाममा पानीको बहाव बढेसँगै झरनाको स्वरूप अझ मनमोहक देखिन्छ। वरपरको हरियाली, चिसो मौसम, पानीको कलकल आवाज र प्राकृतिक वातावरणले आगन्तुकलाई केही समय शहरको व्यस्त जीवनबाट टाढा पुर्याउँछ। यही कारण छोटो समयमै प्रकृतिको आनन्द लिन चाहनेहरूका लागि लौके झरना उपयुक्त विकल्पका रूपमा स्थापित हुँदै गएको छ।
लौके झरनाको प्रमुख विशेषता यसको प्राकृतिक वातावरण हो। झरना वरपरको घना जंगल, हरियाली र पहाडी भूगोलले यहाँको सौन्दर्यलाई थप आकर्षक बनाएको छ। ठूलो छहरे र सानो छहरेलगायतका प्राकृतिक दृश्य यहाँका थप आकर्षण हुन्। वर्षाको समयमा पहाडबाट तीव्र गतिमा झर्ने पानी, वरिपरि फैलिएको हरियो वनस्पति र कुहिरोले झरना क्षेत्रलाई अझ मनमोहक बनाउने गर्दछ। प्रकृतिको दृश्य कैद गर्न चाहने फोटोग्राफर तथा मोबाइलबाट तस्वीर र भिडियो बनाउन रुचाउने युवाका लागि पनि यो स्थान आकर्षक बनेको छ।
लौके झरनाको अर्को विशेषता काठमाडौं नजिकै भएर पनि ग्रामीण तथा प्राकृतिक वातावरणको अनुभव गर्न सकिनु हो। काठमाडौंको भीडभाड र कोलाहलबाट केही घण्टाका लागि बाहिर निस्कन चाहनेहरूका लागि यो छोटो दूरीको गन्तव्य हुन सक्छ। लामो समय छुट्टी मिलाउन नसक्ने व्यक्तिहरूले पनि बिहान काठमाडौं छाडेर दिनभर झरना तथा आसपासका क्षेत्रमा समय बिताई साँझ फर्कन सक्ने भएकाले डे ट्रिपका लागि यसको सम्भावना बढेको छ।
झरना पुग्न काठमाडौं उपत्यकाबाट टोखा–गुर्जे भञ्ज्याङ हुँदै नुवाकोटतर्फ जाने मार्ग प्रयोग गर्न सकिन्छ। निजी सवारीसाधन, मोटरसाइकल तथा साइकलमा समूह बनाएर यात्रा गर्नेहरूको संख्या पनि बढ्दै गएको छ। मुख्य सडकबाट गन्तव्यतर्फ जाँदा ग्रामीण बस्ती, हरियाली, पहाडी भूगोल र स्थानीय जीवनशैलीका दृश्यले यात्रालाई थप रमाइलो बनाउँछन्। झरनाको नजिक पुगेपछि केही दूरी पैदल हिँड्नुपर्ने भएकाले यात्रुहरूले छोटो हाइकिङको अनुभवसमेत लिन सक्छन्।
साथीभाइसँगको घुमघामका साथै परिवारका सदस्यसँग प्रकृतिको आनन्द लिन चाहनेहरूका लागि पनि लौके झरना उपयुक्त देखिन्छ। युवाहरूका लागि पिकनिक, ह्याङ्गआउट र क्वालिटी टाइम बिताउने ठाउँका रूपमा यसको लोकप्रियता बढिरहेको छ। साइकलयात्री, हाइकिङमा रुचि राख्ने व्यक्ति, फोटोग्राफी प्रेमी तथा नयाँ गन्तव्य खोज्ने आन्तरिक पर्यटकका लागि पनि यो ठाउँ आकर्षक बन्न सक्छ। विशेषगरी सामाजिक सञ्जालमा प्राकृतिक गन्तव्यका तस्वीर तथा भिडियो साझा गर्ने प्रवृत्तिले यस्ता ठाउँको परिचय अझ छिटो फैलाउने गरेको छ।
यद्यपि, झरना भ्रमण गर्दा सुरक्षा पक्षलाई भने बेवास्ता गर्न । मनसुनका बेला पानीको बहाव अचानक बढ्न सक्ने भएकाले झरनाको मुख्य धार तथा चिप्ला ढुंगामा सावधानी अपनाउन आवश्यक हुन्छ। वर्षायाममा झरनासम्म पुग्ने बाटो पनि हिलो र चिप्लो हुन सक्ने भएकाले हिँड्दा विशेष ध्यान दिनुपर्छ। बालबालिका तथा ज्येष्ठ नागरिकसँग यात्रा गर्दा उनीहरूको हिँडडुल र सुरक्षामा थप ध्यान दिनु आवश्यक हुन्छ। मौसमको अवस्था बुझेर यात्रा योजना बनाउनु पनि उत्तिकै महत्त्वपूर्ण छ।
झरना आसपासका क्षेत्रमा उपभोग्य वस्तु तथा आवश्यक सेवाहरू पर्याप्त नहुन सक्ने भएकाले यात्रामा आवश्यक सामग्री आफैंले बोकेर जानु उपयुक्त हुन्छ। पिउने पानी, हल्का खाजा, आरामदायी तथा चिप्लो बाटोमा पनि सहज हुने जुत्ता, रेनकोट वा छाता र आवश्यक परे अतिरिक्त कपडा साथमा राख्नु राम्रो हुन्छ। स्थानीयस्तरमा चिया तथा खाजाका केही सुविधा र पार्किङ उपलब्ध हुन सक्ने भए पनि सबै समयमा पर्याप्त सेवा पाइन्छ भन्ने निश्चित नहुने भएकाले पूर्वतयारी गरेर जानु सुरक्षित हुन्छ।
प्राकृतिक गन्तव्यमा बढ्दो पर्यटकीय चापसँगै वातावरण संरक्षणको विषय पनि उत्तिकै महत्त्वपूर्ण छ। झरना तथा जंगल क्षेत्रमा प्लास्टिकका बोतल, प्याकेट तथा अन्य फोहोर जथाभावी फाल्दा प्राकृतिक सौन्दर्यमा असर पर्न सक्छ। त्यसैले आगन्तुकले आफूले लगेको फोहोर आफैंसँग फिर्ता ल्याउने, पानीका स्रोत प्रदूषित नगर्ने र वन क्षेत्रको प्राकृतिक स्वरूपमा असर नपर्ने गरी भ्रमण गर्ने जिम्मेवारी लिन आवश्यक छ। स्थानीय तह तथा समुदायले पनि फोहोर व्यवस्थापन, पदमार्ग सुधार, सूचना बोर्ड र सुरक्षा व्यवस्थामा ध्यान दिन सके यस क्षेत्रको पर्यटन सम्भावना अझ बढ्न सक्छ।
