प्रदर्शनकारीले काँग्रेस सभापति शेरबहादुर देउवाको बुढानीलकण्ठस्थित निवासमा तोडफोडको प्रयास गरेका छन्। बिहान देउवा निवास तर्फ अघि बढेका आन्दोलनकाीलाई प्रहरीले कृष्णपाटी चोकमा रोके पनि भिड थपिएपछि प्रयास भएको हो।
नेकपा (माओवादी केन्द्र) का अध्यक्ष पुष्पकमल दाहालको खुमलटारस्थित निवासमा प्रदर्शनकारीहरूले ढुंगा प्रहार गरेका छन्।काठमाडौं उपत्यकामा जेन-जीको दोस्रो दिनको आन्दोलन अझ उग्र बनेको छ।
मधेस भवन प्रवेश गर्न खोज्दै युवाहरू
आज बिहानैदेखि जनकपुरमा युवाहरू सरकारविरुद्ध प्रदर्शनमा उत्रेका छन्। उनीहरू प्रधानमन्त्रीको राजीनामा माग्दै मधेस प्रदेशको मुख्यमन्त्री कार्यालयमा पुगेका छन्। प्रहरीले उनीहरूलाई मधेस भवनमा प्रवेश गर्न नदिएपछि भवनमा ढुङ्गामुडा गरेका छन्।
बाटोको छेउमा रहेका भौतिक पूर्वाधार विकास मन्त्राल र शिक्षा तथा संस्कृति मन्त्रालयको सिसा फुटाएका छन्। प्रदर्शनकारी युवाहरूले सशस्त्र प्रहरीको गाडी समेत तोडफोड गरेका छन्।
अहिले मधेस भवनको सुरक्षामा ठुलो संख्यामा प्रहरी परिचालन गरिएको छ। प्रधानमन्त्रीको राजीनामा माग्दै युवाहरू मधेस भवनका अगाडि नाराबाजी गरिरहेका छन्।सोमबार १९ जनाको ज्यान जानेगरी भएको प्रदर्शनपछि आज पुन: देशभर प्रदर्शन भइरहेको छ।
अर्घाखाँचीमा बिहानैदेखि जेन-जीको प्रदर्शन : निशानामा पार्टीका कार्यालय
अर्घाखाँचीमा मङ्गलवार बिहानै देखि प्रदर्शन चर्किएको छ । सरकार नरसंहारमा उत्रिएको भन्दै बिहानै देखि युवा-युवती तथा विद्यार्थीहरू प्रदर्शनमा उत्रिएका हुन् । अर्घाखाँचीका निर्मल सारुको हिजो काठमाडौंमा प्रदर्शनका क्रममा मृत्यु भएपछि आक्रोश बढेको हो ।
भक्तीटोल चोकबाट सुरु भएको प्रदर्शन जिल्ला प्रहरी कार्यालय, सन्धिखर्क नगरपालिका हुन्दै शान्ति बगैंचातर्फ गएको छ । गुरुदेव खनाल, पुष्कर पौडेल, प्रकाश श्रेष्ठ लगायतका युवाहरुको नेतृत्वमा प्रदर्शन अघि बढेको आयोजकले बताएको छ ।
अर्घाखाँचीमा हिजो पनि ‘जेन-जी’को प्रदर्शन भएको थियो । जिल्ला सदरमुकाम सन्धिखर्कमा विभिन्न प्लेकार्डसहित स्थानीय युवा-युवती प्रदर्शनमा उत्रिएका थिए । हिजो बेलुका मसाल जुलुससहित प्रदर्शन भएको थियो ।
काठमाडौंसहितका स्थानमा करिब दुई दर्जन व्यक्तिको मृत्यु भएपछि देशैभर आक्रोश बढेको छ । ‘जेन-जी’ पुस्ता मात्र नभएर आज स्वतःस्फूर्त सबै पिढीका नागरिक सडकमा उत्रिएका छन् ।
प्रदर्शनकारीले मेनलाइनमा रहेको राष्ट्रिय स्वतन्त्र पार्टी (रास्वपा) को पार्टी कार्यालय, गौरीशंकरचोकमा रहेको नेपाली कांग्रेसको पार्टी कार्यालय र शान्ति बगैंचा मुनि पट्टी रहेको नेकपा (एमाले) को कार्यालयमा सामान्य तोडफोड गरेका छन् । पार्टी कार्यालयहरूमा राखिएका बोर्डहरू फालिएका छन् ।
