आइएमई समूहकाे कागज उद्योग सन्चालनमा

वित्त र सेवा क्षेत्रमा स्थापित आइएमई समूहले उत्पादनमूलक क्षेत्रमा पनि लगानी विस्तार गरेको छ । समूहले पहिलो पटक प्रयासमा कागज उद्योग सञ्चालनमा ल्याएर उत्पादनमूलक क्षेत्रमा आफूलाई प्रवेश गराएको हो । समूहले महोत्तरीको गौशाला नगरपालिका–१ स्थित रामनगरको इटाटारमा नेपाल पल्प एन्ड पेपर इन्डस्ट्रिज सञ्चालनमा ल्याएको हो । करिब दुई अर्ब लगानीमा सञ्चालनमा आएको उद्योगबाट पुस्तक तथा कपीका लागि आवश्यक कागज उत्पादन हुने उद्योगका सञ्चालकसमेत रहेका आइएमई समूहका अध्यक्ष चन्द्रप्रसाद ढकालले जानकारी दिए  ।

नेपालमा खपत हुने कागजबापत बर्सेनि अर्बौं रुपियाँ बाहिरिएकाले त्यसलाई प्रतिस्थापन गरी स्वदेशी वस्तुको उपयोग बढाउने उद्देश्यसहित उद्योग सञ्चालनमा ल्याइएको उनकाे भनाइ छ ।  “कागजको आयात प्रतिस्थापन गर्ने र नेपालमै लगानीको अवसर सुनिश्चित गर्ने उद्देश्यले उद्योग सञ्चालनमा ल्याएका हौँ,” उनले भने ।

उद्योगमा दैनिक ७५ टनसम्म कागज उत्पादन गर्न सक्ने जडित क्षमता छ । माग बढेको अवस्थामा उत्पादन क्षमता पनि बढाउन सक्ने गरी तयारी अवस्थामा रहेको ढकालले जानकारी दिदै भने  “आवश्यकता र मागका आधारमा उत्पादन क्षमता बढाउन सक्ने अवस्था छ,भविष्यमा निर्यात पनि गर्न सक्ने गरी तयारी अवस्थामा छौँ ।”

१९ बिघा क्षेत्रफलमा फैलिएको उद्योगमा करिब दुई सय जनाले रोजगारी पाएका छन् । स्थानीयलाई प्राथमिकता दिएर रोजगारी उपलब्ध गराइएको ढकालले जानकारी दिए  । आधुनिक प्रविधियुक्त औद्योगिक उपकरणमार्फत उत्पादन हुने भएकाले कागज गुणस्तरीय हुने र आयातित कागजसँग सहजै प्रतिस्पर्धा गर्न सक्ने उनको दाबी छ । “नेपालमै उत्पादन हुँदा मूल्य पनि सर्वसुलभ नै हुन्छ,” ।

अहिले नेपालमा बार्षिक करिब एक लाख २५ हजार टन कागज खपत हुने गर्छ । जसमध्ये अधिकांश हिस्सा आयातित कागजको छ । उद्योगबाट उत्पादित कागजले ३० प्रतिशतभन्दा कागजको आयात प्रतिस्थापन गर्ने विश्वास गरिएको छ । यसै ग्रुपले पाथिभरामा पनि केबुलकार संचालनका लागी निर्माण गरिरहेकाे मा हाल बिवादका कारण निर्माण प्रकृया राेकिएकाे छ ।