फिफा विश्वकप अन्तर्गत राउन्ड अफ ३२ अन्तर्गत आज मंगलबार नर्वे र आइभरी कोस्ट प्रतिस्पर्धा गर्दैछन्। डलासमा हुन लागेको खेल नेपाली समय अनुसार १०ः४५ बजेबाट सुरु हुँदैछ। समूह ‘ई’ मा दोस्रो स्थान हासिल गर्दै आइभरी कोस्ट पहिलो पटक विश्वकपको नकआउट चरणमा छनोट भएको हो। टोलीले आफ्ना पछिल्ला छ खेलहरूमध्ये पाँच जितेको छ।
आइभरी कोस्टले युरोपेली टोलीहरू विरुद्धको आफ्नो पछिल्ला पाँच विश्वकप खेलहरूमध्ये एउटा मात्र जितेको छ। टोली नकआउट चरणमा नर्वेलाई हराउँदै राउन्ड अफ १६ मा प्रवेश गर्दै अर्को इतिहास बनाउने लक्ष्यसहित मैदानमा उत्रनेछ।समूह चरणमा उनीहरुले इक्वेडरलाई १–० र कुरासाओलाई २–० ले पराजित गरेका थिए। टोलीले जर्मनीसँग भने २–१ ले हार बेहोरेको थियो।
उता, नर्वे छ अंकका साथ समूह ‘आइ’ मा दोस्रो स्थान हासिल गर्दै विश्वकपको अन्तिम ३२ मा पुगेको हो। उनीहरूले इराकमाथि ४–१ को प्रभावशाली जित हासिल गर्दै सुरुवात गरेका थिए। त्यसपछि सेनेगलमाथि ३–२ को रोमाञ्चक जित हासिल गरे।
नकआउट चरणमा स्थान पक्का भइसकेको अवस्थामा नर्वे फ्रान्स विरुद्ध ४–१ ले पराजित भयो। उक्त खेलमा एर्लिङ हालान्ड र मार्टिन ओडेगार्ड जस्ता खेलाडीहरूलाई आराम दिइएको थियो। हालान्ड आइभरी कोस्ट विरुद्धको खेलमा सुरुवाती टोलीमा फर्कने पूर्ण अपेक्षा गरिएको छ। प्रतियोगितामा उनी चार गोलसहित गोल्डेन बुटको दौडमा छन्।
नर्वेले सबै प्रतियोगिताहरूमा अफ्रिकी राष्ट्रहरू विरुद्धका १९ खेलहरूमध्ये केवल दुई खेल मात्र हारेको छ।
