नेकपा (एमाले)ले प्रधानमन्त्रीले संसदमा दिएको सीमासम्बन्धी अभिव्यक्तिप्रति गम्भीर आपत्ति जनाएको छ। एमाले प्रचार तथा प्रकाशन विभाग प्रमुख नीरज आचार्यले सामाजिक सञ्जाल फेसबुकमार्फत प्रधानमन्त्रीको भनाइलाई गैरजिम्मेवार, तथ्यहीन र राष्ट्रिय हितविपरीत रहेको बताएका छन्।
आचार्यले प्रधानमन्त्रीजस्तो जिम्मेवार पदमा रहेको व्यक्तिले संसद्को रोस्ट्रमबाट ‘नेपालले पनि अरूको सीमा मिचेको छ’ भन्नु अत्यन्तै खेदजनक रहेको उल्लेख गरेका छन्। ऐतिहासिक दस्ताबेज, नक्सा र तथ्यहरूले नेपालको भूमि अतिक्रमणमा परेको विषयलाई स्पष्ट रूपमा देखाउने भएकाले प्रधानमन्त्रीको भनाइले भ्रम सिर्जना गरेको उनको भनाइ छ।
उनले आफ्नो देशको भौगोलिक अखण्डता र सार्वभौमसत्ताको रक्षा गर्नुपर्ने जिम्मेवारीमा रहेको नेतृत्वबाट नेपाललाई नै दोषी देखाउने अभिव्यक्ति आउनु राष्ट्रिय हितमाथिको गम्भीर आघात भएको बताएका छन्।
एमालेले उक्त भनाइले सीमा सुरक्षामा खटिएका सुरक्षाकर्मी, इतिहास तथा सीमासम्बन्धी अध्ययन–अनुसन्धानमा संलग्न विज्ञहरू र आमनेपाली जनताको भावनामाथि चोट पुगेको जनाएको छ। राष्ट्रिय स्वाधीनता र सीमाजस्तो संवेदनशील विषयमा प्रधानमन्त्रीबाट आएको अभिव्यक्ति अपरिपक्व र भ्रमपूर्ण रहेको एमालेको ठहर छ।
एमालेले प्रधानमन्त्रीको उक्त भनाइ सच्याउँदै सरकारलाई संसद् तथा आमजनतासमक्ष स्पष्ट धारणा सार्वजनिक गर्न माग गरेको छ। साथै, राष्ट्रियता, सार्वभौमसत्ता र भौगोलिक अखण्डतासम्बन्धी विषयमा कुनै पनि प्रकारको अस्पष्टता वा सम्झौता स्वीकार्य नहुने एमालेले जनाएको छ।
रेकर्डबाट हटाउनु पर्छ सासंद पुन
नेपाली कम्युनिस्ट पार्टीका नेता वर्षमान पुनले प्रधानमन्त्री बालेन्द्र शाहले सीमा विवादबारे दिएको अभिव्यक्ति संसद्को रेकर्डबाट हटाउन माग गरेका छन्।
संसद् बैठकपछि पुनले पत्रकारहरूसँग भने, ‘त्यो असाध्यै गम्भीर विषय हो, तुरुन्तै त्यसलाई संसद्को रेकर्डबाट हटाउनुपर्छ। यो कुनै पनि प्रकारको राष्ट्रिय रेकर्डमा रहनुहुँदैन।’
कुन-कुन ठाउँमा नेपालले भारतको सीमा मिचेको छ भन्ने तथ्य प्रस्तुत गर्न उनले प्रधानमन्त्रीलाई चुनौती दिए। इतिहास, तथ्य र प्रमाणले कहीँ पनि भारतको जमिन नेपालले मिचेको भन्ने पुष्टि नभएको उल्लेख गर्दै उनले भने, ‘यो कुरा तुरुन्त उहाँले तथ्यसहित प्रस्तुत गर्नुपर्छ र आफ्ना कुराहरू फिर्ता लिनुपर्छ। माफी माग्नुपर्छ।’
भोलिसम्म सभामुखले यो विषय संसद्को रेकर्डबाट हटाउनुपर्ने भन्दै पुनले तथ्य प्रस्तुत गर्दै प्रधानमन्त्रीले क्षमा नमागे सदनमा विरोध गर्ने बताए।
