इराकी सुरक्षा निकायले भ्रष्टाचार विरुद्ध सञ्चालन गरिएको अभियानका क्रममा संसद्का सदस्यसहित ४७ जना अधिकारीलाई पक्राउ गरेको सरकारी सञ्चारमाध्यमले जनाएको छ ।
हालै प्रधानमन्त्री नियुक्त हुनुभएका अली अल–जैदीले पदभार ग्रहण गरेसँगै भ्रष्टाचार नियन्त्रण र राज्यको सुरक्षा संयन्त्रलाई सुदृढ बनाउने प्रतिबद्धता व्यक्त गरेका थिए । उनको नेतृत्वमा सञ्चालन गरिएको यो अभियान आगामी महिना हुने अपेक्षित संयुक्त राज्य अमेरिकाको भ्रमणअघि सुरु गरिएको हो ।
सरकारी समाचार संस्था आईएनएका अनुसार भ्रष्टाचारसम्बन्धी आरोपमा पक्राउ परेकामध्ये संसद्का सदस्य, विभिन्न सरकारी अधिकारी तथा तेल मन्त्रालयका कम्तीमा एक अधिकारी रहेका छन् ।आइतबार बिहान बग्दादस्थित उच्च सुरक्षा व्यवस्था रहेको ‘ग्रीन जोन’ तथा राजधानीका अन्य क्षेत्रमा आतंकवादविरोधी एकाइसहितका सुरक्षा बलले छापा मारेपछि पक्राउ प्रक्रिया सुरु भएको थियो ।
ग्रीन जोनमा अमेरिकी दूतावास, अन्य कूटनीतिक नियोग, अन्तर्राष्ट्रिय संस्थाका कार्यालय तथा सरकारी निकाय रहेका छन् । उच्चपदस्थ सरकारी अधिकारी र राजनीतिज्ञहरूको आवास पनि यही क्षेत्रमा छ ।स्थानीय सञ्चारमाध्यम र सामाजिक सञ्जालमा सार्वजनिक भएका भिडियोमा सुरक्षा बललाई बख्तरबन्द सवारीसाधनसहित ग्रीन जोनका विभिन्न स्थानमा परिचालन गरिएको देखिएको छ ।
बग्दादस्थित एक कूटनीतिक स्रोतलाई उद्धृत गर्दै एएफपीले जनाएअनुसार प्रधानमन्त्री जैदीको भ्रष्टाचारविरुद्धको अभियानलाई उनको वासिङ्टन भ्रमणको तयारी तथा सुधारप्रतिको प्रतिबद्धता प्रदर्शनका रूपमा पनि हेरिएको छ । यसैबीच, इरानी विदेशमन्त्री अब्बास अराघचीको बग्दाद भ्रमणसँगै उक्त अभियान सञ्चालन गरिएको हो । उनले नयाँ इराकी सरकारसँग सबै क्षेत्रमा सहयोग विस्तार गर्न तेहरान प्रतिबद्ध रहेको बताएका छन् ।
इराक लामो समयदेखि आफ्नो छिमेकी इरान र संयुक्त राज्य अमेरिकाबीचको प्रतिस्पर्धी प्रभावको सन्तुलन कायम गर्ने प्रयासमा रहेको छ । एक सुरक्षा अधिकारीका अनुसार पछिल्लो अभियान भ्रष्टाचार नियन्त्रणका साथै अवैध वित्तीय कारोबार, अमेरिकी डलर तथा इरानी तेल तस्करीमा संलग्न समूह विरुद्धको व्यापक कारबाहीको पनि हिस्सा हो ।
