नेपालले स्कटल्यान्डमाथि १२ वर्षपछि जित निकालेको छ। स्कटल्यान्डमा जारी त्रीदेशीय टी-२० अन्तर्राष्ट्रिय शृंखलामा नेपालले स्कटल्यान्डलाई २ विकेटले पराजित गरेको हो। सन् २०१३ पश्चात नेपालले पहिलो पटक स्कटल्यान्डलाई हराएको हो। तितवुड क्रिकेट मैदानमा टस हारेर ब्याटिङ गरेको स्कटल्यान्डले ९७ रन बनाएको थियो। ९८ रनको सामान्य लक्ष्य पछ्याएको नेपालले १९.५ ओभरमा ८ विकेट गुमाउँदै लक्ष्य पूरा गरेको हो।
अन्तिम ओभरमा जितका लागि ४ रन चाहिएको अवस्थामा १९.४ ओभरमा नेपालले आठौं विकेट गुमायो। नेपाललाई जितको लागि १ रन मात्रै चाँहिदा किरण ठगुन्ना क्याच आउट भए। करण केसी ३ र सन्दीप लामीछाने १ रनमा अविजित रहे। नेपालका लागि ओपनर कुशल भुर्तेलले सर्वाधिक ३० रन बनाए। उनले ३५ बलमा ४ चौका प्रहार गरे। नेपालले पहिलो विकेटको रुपमा २.४ ओभरमा लोकेश बमलाई गुमाए। २१ रन बनाउँदा नेपालले पहिलो विकेट गुमाएको हो। उनलाई ब्रान्डन म्याकमुलेनले जर्ज मुन्सेको हातमा क्याच गराएका हुन्।
३.१ ओभरमा नेपालले दोस्रो विकेटको रुपमा अनिल शाहलाई गुमायो। उनी ३ रन बनाउँदै ज्याक जार्भिसको बलमा बोल्ड भए। पावरप्लेमा २ विकेट गुमाउँदै नेपालले ३१ रन बनायो। त्यसपश्चात्, ७.२ ओभरमा कप्तान रोहित पौडेलको विकेट गयो। उनलाई ७ रनमा सफ्यान सरिफले बोल्ड आउट गरेका थिए। १० ओभरमा नेपालले ३ विकेट गुमाउँदै ४९ रन बनाएको थियो।
१२.१ ओभरमा नेपालले चौथो विकेटको रुपमा कुशल भुर्तेललाई गुमायो। उनलार्ए मार्क वाटले एलबीडब्ल्यू आउट गराएका हुन्। पाँचौं विकेटको रूपमा नेपालका उपकप्तान दीपेन्द्र सिंह ऐरीको विकेट गयो। १४.६ ओभरमा १४ रन बनाउँदै क्याच आउट भए। छैटौं विकेटको रूपमा बसिर अहमद १३ रनमा माइकल लिस्कको हातबाट कट एण्ड बोल्ड भए। सातौं विकेट रुपेश सिंहको गयो। उनी ६ रन बनाउँदै क्याच भए।
स्कटल्यान्डका लागि माइकल लिस्क रसफ्यान सफिकले समान २-२ विकेट लिए। ब्रान्डन म्याकमुलेन, मार्क वाट, ज्याक जार्भिस र जास्पर डेविटसनले समान १-१ विकेट लिए। त्यसअघि ब्याटिङ गरेको स्कटल्यान्ड १९.४ ओभरमा अलआउट हुँदै ९७ रन मात्रै बनाएको थियो। स्कटल्यान्डका लागि मिचेल लिस्कले सर्वाधिक ४६ रन बनाए। उनले ४६ बलमा ४ चौका र १ छक्का प्रहार गरे।
ओपनरद्वय जर्ज मुन्से र मार्क वाटले क्रमशः ८ र १ रन बनाउँदै पेभेलियन फर्किए। ब्रान्डन म्याकमुलेनले १० रन बनाउँदा कप्तान म्याथ्यु क्रसले १५ रन बनाउँदै पेभेलियन फर्किए। अन्य कुनै पनि ब्याटरले दोहोरो अंकमा रन बनाउन सकेनन्।
नेपालका लागि सन्दीप लामीछानेले सर्वाधिक ४ विकेट लिए। उनले ४ ओभरमा १ मेडनसहित ११ रन खर्चिए। करण केसी र दीपेन्द्र सिंह ऐरीले २-२ विकेट लिए। ललित राजवंशीले १ विकेट लिए। नेपालले शृंखलाको पहिलो खेलमा नेदरल्यानड्ससँग तेस्रो सुपर ओभरमा हार व्यहोरेको थियो।
नेपालले १२ वर्षपछि स्कटल्यान्डसँग टी-२० फर्म्याटको खेल खेलेको थियो। यो नेपाल र स्कटल्यान्डको पहिलो टी-२० अन्तर्राष्ट्रिय खेल थियो। यसअघि नेपालले २०१३ मा पहिलो पटक स्टकल्यान्डसँग आइसीसी विश्वकप टी-२० क्वालिफार्यस खेलेको थियो। जसमा नेपाल ८ विकेटले पराजित भएको थियो।
