राजस्व अनुसन्धान विभागले विदेशी मुद्रा अपचलन सम्बन्धी कसूरमा ट्रक चालक कुशाङ लामा र पैसाका मालिक भनिएका नारायण पौडेलविरुद्ध काठमाडौ जिल्ला अदालतमा मुद्दा दायर गरेको छ ।
गत चैत ४ गते काठमाडौं टोखा–२ झोरस्थित सडकमा टोखादेखि झोरतर्फ जाँदै गरेको कुसाङ लामाले चलाएको ना ७ ख १६५२ नं को कन्टेनर ट्रकबाट काठमाडौं उपत्यका अपराध अनुसन्धान कार्यालय टेकुको टोलीले विदेशी मुद्रा (नेपाली २५ करोडभन्दा बढी) बरामद गरेको थियो ।
‘अनुसन्धानको लागि यस विभागमा प्राप्त भएकोमा अनुसन्धानका क्रममा संकलित आधार प्रमाणबाट प्रतिवादीहरु कुसाङ लामा र नारायण पौडेलविरुद्ध विदेशी विनिमय नियमित गर्ने ऐन, २०१९ को दफा ३,४, ५ र ९ को कसूरमा वरामदित विदेशी मुद्राहरुको मिति २०८१/२/०४ गतेको नेपाल राष्ट्र बैंकले निर्धारण गरेको विदेशी विनिमय दर अनुसार हुन आउने नेपाली रुपैयाँ २५ करोड ३४ लाख १८हजार ८सय ४२ रुपैयाँ मात्र बिगो कायम गरी ऐ ऐनको दफा १७ को उपदफा १ बमोजिम जरिवाना गरी सोही ऐनको दफा १७ को उपदफा (१) बमोजिम थप सजाय हुन र प्रतिवादी कुसाङ लामालाई सुन चोरी पैठारी मुद्दामा श्री काठमाडौ जिल्ला अदालतबाट मिति २०७४/०३/२६ गले सजाय हुने ठहर भई निजले सजाय भुक्तान गरेको पाँच वर्षभित्र प्रस्तुत कसूर गरेको देखिँदा निजलाई मुलुकी अपराध संहिता २०७४ को दफा ४४२ बमोजिम थप सजाय हुन विदेशी विनिमय नियमित गर्ने ऐन २०१९ को दफा १७ को उपदफा (१) बमोजिम बरामद उक्त विदेशी मुद्राहरु जफत गरी पाउन उक्त वारदातमा प्रयोग भएको ना ७ ख १६५२ नम्बरको कन्टेनर (ट्रक) कसूरजन्य सम्पत्ति तथा साधन रोका, नियन्त्रण र जफत ऐन, २०७४ को दफा ११ बमोजिम जफतको मागदाबी लिई मुद्दा दायर गरिएको छ,’– विभागले जारी गरेको विज्ञप्तिमा भनिएको छ ।
प्रतिवादी पौडेल हाल फरार छन् । उक्त पैसाका धनी पौडेलको हकमा अदालतबाटै कानुन बमोजिमको म्याद जारी गर्नै भनिएको छ ।प्रतिवादी लामा र पौडेल दुवैको घर सिन्धुपाल्चोक हो । पाैडेल माओवादि निकट व्यत्ती हुन ।
