हिरासतमा रहेका धवलशमशेरले भने: ‘नआत्तिनुस्, गन्तव्य नजिक छ, म ठीक छु, सबैलाई भन्दिनुस्’

      मिश्र र राणाको अडान: अस्पतालको सुविधा लिँदैनौं, हिरासतमै लड्छौं

राजसंस्था पुनर्स्थापना जनआन्दोलनका नेताद्वय डा. धवलशमशेर राणा र रवीन्द्र मिश्रले स्वास्थ्य समस्याका कारण अस्पताल बस्ने सुविधा अस्वीकार गर्दै हिरासतबाटै आन्दोलन जारी राख्ने घोषणा गरेका छन्।

आइतबार काठमाडौं जिल्ला अदालतको इजलासमा उनीहरूले यस्तो अडान लिएका हुन्। “स्वास्थ्य समस्याले दिइने अस्पतालको सुविधा म लिँदिन,” संयुक्त जनआन्दोलन परिचालन समितिका सदस्यसचिव तथा राप्रपा उपाध्यक्ष मिश्रले भने। आन्दोलन संयोजक राणाले थपे, “राज्यले ज्यान लिन्छ भने लिओस्, रवीन्द्रको साथ छाड्दिनँ, हिरासतमै बसेर लडाइँ लड्छु।”

मिश्रको उच्च रक्तचाप र क्यान्सरबाट पीडित राणाको नियमित स्वास्थ्य परीक्षणका लागि वकिलहरूले अस्पताल सुविधाको अनुरोध गरेका थिए। तर, दुवैले अस्वीकार गरेपछि वकिलहरूले निवेदन फिर्ता लिए। राणाको क्यान्सर शल्यक्रियापछि वैशाख १५ मा भारतमा परीक्षण तय थियो।

“आगजनी, लुटपाट, गोली वा अश्रुग्यास हान्ने र मान्छे मार्ने कार्यमा हाम्रो संलग्नता छैन। सरकारले शान्तिपूर्ण प्रदर्शनमा दमन गर्‍यो र भीडलाई उत्तेजित बनायो,” उनीहरूले इजलासमा भने। चैत १५ को तीनकुने प्रदर्शनमा संलग्नताको आरोपमा अदालतले उनीहरूलाई हिरासतमा राखेर अनुसन्धान गर्न ५ दिन म्याद थप गरेको छ।