युक्रेन र संयुक्त राज्य अमेरिकाका वरिष्ठ प्रतिनिधिमण्डलबीच मस्कोसँगको तीन वर्ष लामो युद्ध कसरी अन्त्य गर्ने भन्ने विषयमा आज साउदी अरेबियाको जेद्दाहमा उच्चस्तरीय वार्ता सुरु भएको छ।
वार्ता रूसी हवाई प्रतिरक्षाले रातभर रूसमाथि भएको ठूलो युक्रेनी ड्रोन आक्रमणमा ३३७ ड्रोनहरू खसालेको केही घण्टापछि सुरु भएको हो। रूसको रक्षा मन्त्रालयका अनुसार, तीमध्ये ९१ ड्रोन मस्को क्षेत्रमा खसालिएका थिए।
१० वटा रूसी क्षेत्रहरूमा फैलिएको ड्रोन आक्रमणलाई हालसम्मकै सबैभन्दा ठूलोमध्ये एक मानिएको छ। यस आक्रमणमा मस्को क्षेत्रमा कम्तीमा तीन जनाको मृत्यु भएको अन्तर्राष्ट्रिय सञ्चारमाध्यमहरूले जनाएका छन्। मृतकमध्ये दुई जना मस्कोस्थित मिराटोर्ग कम्पनीका कर्मचारी थिए।
यसबाहेक, २० जनासम्म घाइते भएका छन्। मस्को र आसपासका गाउँहरू जस्तै साप्रोनोभो र डोमोडेडोभोमा ठूलो क्षति भएको छ। अपार्टमेन्ट ब्लक र सुपरमार्केटको कार पार्कमा पनि क्षति पुगेको देखिएको छ। चार प्रमुख मस्को विमानस्थलहरू (डोमोडेडोभो, शेरेमेत्येभो, झुकोभ्स्की र व्नुकोभो) मा उडानहरू अस्थायी रूपमा बन्द गरिएको थियो। तर पछि रूसको उड्डयन प्राधिकरणले प्रतिबन्ध हटाएको जानकारी दिएको छ।
जेद्दाको रिट्ज-कार्लटन होटलमा भएको यो बैठकमा युक्रेनी विदेशमन्त्री आन्द्रिय सिबिहा र रक्षामन्त्री रुस्तेम उमेरोभले अमेरिकी विदेशमन्त्री मार्को रुबियोसँग भेट गरेका थिए। यो वार्ता दोस्रो विश्वयुद्धपछिको युरोपको सबैभन्दा ठूलो द्वन्द्व अन्त्य गर्ने प्रयासको हिस्सा हो। बैठक सुरु हुँदा युक्रेनी अधिकारीहरू गम्भीर मुद्रामा देखिए, तर क्यामेराको अगाडि उनीहरूले हल्का मुस्कान पनि बाँडे ।
ड्रोन आक्रमणबारे युक्रेनी वा अमेरिकी पक्षबाट तत्काल कुनै आधिकारिक टिप्पणी आएको छैन। यद्यपि, वार्ताको ठीक अघि भएको यो आक्रमणलाई रणनीतिक सन्देशको रूपमा हेरिएको छ। बैठक कोठामा अमेरिकी, साउदी र युक्रेनी झण्डाहरू फहराइएका थिए, र साउदी अरेबियाका विदेशमन्त्री पनि उपस्थित थिए। साउदी भ्रमणमा रहे पनि युक्रेनका राष्ट्रपति भोलोदिमिर जेलेन्स्की यो वार्तामा सहभागी भएनन्।
