जल तथा मौसम विज्ञान विभाग अन्तर्गतको मौसम पूर्वानुमान महाशाखाले अहिले काठमाडौँ उपत्यकासहित देशका पहाडी भू–भागमा हल्का वर्षा भइरहेको जनाएको छ। महाशाखाका मौसमविद् सरोज पुडासैनीका अनुसार अहिले उपत्यकासहित सुदूरपश्चिम, कर्णाली र गण्डकी प्रदेशका केही तथा बाँकी पहाडी भू–भागका एक–दुई स्थानमा मेघ गर्जन र चट्याङसहित वर्षा भइरहेको छ।
उनका अनुसार, “अहिले काठमाडौंको त्रिभुवन विमानस्थल क्षेत्र, गोङ्गबु ,कालिमाटी लगायतको क्षेत्रसहित गण्डकी, लुम्बिनी र कर्णाली प्रदेशको पहाडी भू–भागको केही ठाउँमा वर्षा भइरहेको छ।” पहाडी भू–भागमा शुक्रबार राति पनि वर्षा हुने पूर्वानुमान गरिएको उनको भनाइ छ।
न्युन चापीय प्रणालीको प्रभावका कारण कमवर्षा भए पनि कर्णाली र सुदूरपश्चिम प्रदेशको उच्चपहाडी भूभागका धेरै स्थानमा हल्कादेखि मध्यम हिमपातको सम्भावना रहेको बिभागले जनाएकाे छ ।
पुडनसैनीका अनुसार शनिवार उच्च पहाडी तथा हिमाली भू–भागका थोरै स्थानमा हल्का हिमपातको सम्भावना छ। सबै प्रदेशको पहाडी भू–भागको थोरै ठाउँमा मेघ गर्जन र चट्याङसहित हल्का वर्षाको सम्भावना रहेकाेछ।
आइतबारदेखि भने मौसम मुख्यतया सफा रहने महाशाखाले जनाएको छ। आइतबार कोशी, बागमती, गण्डकी, कर्णाली र सुदूरपश्चिम प्रदेका हिमाली क्षेत्रमा आंशिक बदली रहने तथा अन्य क्षाेत्रमा मौसम मुख्यतया सफा रहने छ।
