जल तथा मौसम विज्ञान अन्तर्गतको मौसम पूर्वानुमान महाशाखाले निरन्तर वर्षा भएका क्षेत्रमा बाढी, पहिरो, गेग्रान बहाव, भूक्षयजस्ता प्रकोपको सम्भावना रहेकाले यसबाट बच्न सतर्कता अप्नाउन आग्रह गरेको छ ।
काठमाडौं उपत्यकासहित देशभर भइरहेको वर्षाका कारण कृषि, स्वास्थ्य, पर्यटन, पर्वतारोहण, सडक तथा हवाई यातायात एवम् दैनिक जनजीवनमा असर पर्न सक्ने भनी सावधानी अप्नाउन आग्रह गरिएको छ। महाशाखाका अनुसार हाल कोशी, मधेस, बागमती, गण्डकी र लुम्बिनी प्रदेशको केही स्थानमा तथा कर्णाली प्रदेशको एक, दुई स्थानमा हल्कादेखि मध्यम वर्षा भइरहेको छ।
आज सोमबार राति कोशी र बागमती प्रदेशको पहाडी र तराई भूभागका थोरै स्थानमा भारीदेखि धेरै भारी वर्षाका साथै गण्डकी र लुम्बिनी प्रदेशको पहाडी र तराई भूभागको एक, दुई स्थानमा भारी वर्षाको सम्भावना छ ।
भोलि मङ्गलबार कोशी, बागमती र गण्डकी प्रदेशको पहाडी भूभागको थोरै स्थानमा, कोशी, बागमती र गण्डकी प्रदेशको तराई तथा लुम्बिनी प्रदेशको पहाडी भूभागको एक, दुई स्थानमा भारी वर्षाको सम्भावना छ। पर्सी कोशी, बागमती, गण्डकी र लुम्बिनी प्रदेशको पहाडी भूभागको एक, दुई स्थानमा भारी वर्षाको सम्भावना रहेको महाशाखाले जनाएको छ।
फाेटाे साभारः गाेरखापत्र दैनिक ।
