मनास्लु क्षेत्रमा भारी हिमपात

साम्दो क्षेत्रको पदमार्ग क्षेत्रमा जमेको हिउँ शनिबार बिहान शसस्त्र प्रहरीले पन्छाएको पनि थियो ।शुक्रबारबाट लगातार हिमपात भइरहेको बीओपी साम्दोका प्रहरी निरीक्षक धर्मराज पण्डितले बताए । ‘तीन/चार दिन अघिदेखि हिमपात त भइरहेको थियो, हिजो(शुक्रबार)बाट लगातार हिउँ परिरहेको छ,’ उनले भने,‘लगातार हिमपात हुँदा पर्यटकहरु साम्दोमा रोकिएका छन्, केही पर्यटक लार्केपास नगरी आज बिहान फर्के  ।’

यो वर्षकै ठूलो हिमपात भएको स्थानीयले बताएका छन् । स्थानीय र पैदलयात्रीलाई सजिलोका लागि साम्दोको बस्ती क्षेत्रको पदमार्गको हिउँ भने शनिबार बिहान सशस्त्र प्रहरीले पन्छाएको छ । ‘बस्ती क्षेत्रको मूल बाटोको हिउँ पन्छाएका छौं,’ उनले भने, ‘स्थानीयलाई सजिलोका लागि पानी लिने धारा जाने र चौरी गोठसम्म जाने बाटोको हिउँ पन्छाएका हौं ।’ शनिबार साँझसम्म नै हिमपात जारी रहेको पनि उनले बताए ।