मावन सेवा फाउन्डेशनले पोखरामा आयोजना गर्ने भनेको कोटीहोमका लागि नयाँ ठाउँ खोज्ने भएको छ ।फाउन्डेशनले लेक साइडमा कोटीहोम आयोजना गर्नेगरी तयारी थालेकोमा पोखरा महानगरले त्यहाँ गर्न नदिने बताउँदै आएको थियो, जसकारण फागुन २३ गते दुई पक्षबीच झडपसमेत भयो ।
विवाद सुल्झाउन बसेको जिल्ला प्रशासन कार्यालय, महानगर र आयोजक प्रतिनिधि सम्मिलित त्रिपक्षीय बैठकले नयाँ ठाउँ खोज्ने सहमति गरेको हो । बैठकमा कोटीहोमको लागि नयाँ ठाउँ खोज्ने र पाँच सदस्यीय विवाद समाधान समिति गठन गर्ने निर्णय भएको प्रमुख जिल्ला अधिकारी भरतमणी पाण्डेले जानकारी दिए । उनका अनुसार आज बस्ने कार्यपालिका बैठकले समितिमा रहने सदस्यहरुको टुंगो लगाउनेछ ।
‘वार्ता सकारात्मक रह्याे, अहिले कोटिहोम गर्ने भनिएको स्थानको विकल्प खोज्न एउटा समिति बनाएर जाने भन्ने निर्णय भएको छ’, उनले भने ।
फाउन्डेशन जसरी पनि लेकसाइडमै कोटीहोम आयोजना गर्न प्रयासरत रहेको र महानगर पनि कार्यक्रम गर्न नदिने अडानमा रहेको पृष्ठभूमिमा प्रजिअ पाण्डेले बैठक बोलाएका थिए ।
