रुपन्देहीमा तस्करहरुले राजश्व अनुसन्धानका कर्मचारी र सुरक्षा निकायका अधिकारीहरुमाथि आक्रमण गरेका छन् । राजस्व अनुसन्धान कार्यालय बुटवलको एउटा टोली भन्सार छलेर ल्याएको चिनी लुम्बिनी साँस्कृतिक नगरपालिका वडा नम्बर २ मुजनामा राखेको खबर पाएपछि गए साँझ छापा हान्न गएको बुझिएको छ ।
तर उक्त टोलीमाथि तस्करहरुले ढुङ्गामुढा र हातपात गरेका छन् । ढुङामुढाबाट राजश्व, सशस्त्र प्रहरी र नेपाल प्रहरीको गाडीमा क्षति पुगेको छ । इलाका प्रहरी कार्यालय लुम्बिनीका प्रहरी निरीक्षक दिपक मगराती घाइते भएको बताइन्छ । राजश्व अनुसन्धान कार्यालय बुटवलका प्रमुख विवेक घिमिरले जनआस्थासँगको कुराकानीमा भने, ‘सूचनाका आधारमा छापा हानेर एकसय १२ बोरा अवैध चिनी बरामद गरेका छौं ।’ उक्त चिनी एउटा पक्की घरको सटरमा लुकाइएको थियो ।
सरकारी र सुरक्षा निकायको टोलीमाथि तस्करहरुको उक्साहटमा झण्डै अढाइसय स्थानीयले आक्रमण गरेका हुन् । आक्रमणको खबर पाएपछि सशस्त्र प्रहरी बल २७ नम्बर गण भैरहवा, रुपन्देही प्रमुख एसपी आनन्द थापाको कमान्डमा पुगेको टोलीले स्थितिलाई नियन्त्रणमा लिएको थियो ।‘समयमै सशस्त्रको टिम नपुगेको भए आज ठूलो दुर्घटना हुने थियो । तर अहिलेलाई दुर्घटना टरेको छ,’ एकजना अनुसन्धान अधिकारिले भने ।रुपन्देहीमा पछिल्लो समय तस्करी अत्यधिक मौलाएको छ । केही महिना पहिले भैरहवा भन्सार कार्यालयको टोलीमाथि मर्चवारमा तस्करहरुले आक्रमण गरेका थिए । दशैंअघि तत्कालीन प्रमुख जिल्ला अधिकारी गणेश अर्याल नेतृत्वको टोलीले राति कपडा र चिनी पक्राउ गरेको थियो ।
