इन्डोनेसियाको पूर्वी टापु फ्लोरेसमा रहेको माउन्ट लिओटोबी लाकी ज्वालामुखी विष्फोट हुँदा १० जनाको मृत्यु भएको छ । न्युयोर्क टाइम्सका अनुसार, आइतबार (नोभेम्बर ३) करिब २४ मिनेटसम्म ज्वालामुखी विस्फोट भएको थियो । त्यसपछि रातभरि कयौँपटक विस्फोट भएको हो । सोमबार बिहान ६ बजेतिर करिब ३०० मिटर उचाइँमा खरानीको बादल देखिएको थियो ।
ज्वालामुखी विष्फोटका कारण दर्जनौँ भूकम्पको धक्का पनि महसुस गरिएको थियो । हाल इन्डोनेसिया सरकारले थप परकम्पन आउन सक्ने बताएको छ ।ज्वालामुखी विष्फोटका कारण सात गाउँका झन्डै १० हजार मानिसले क्षति बेहोरेका छन् । यस क्रममा कयौँ घर जलेर खरानी भए । विस्फोटपछि घरमा आगोका गोला खसेजस्तो देखिएको स्थानीयले बताएका छन् । प्रशासनले ज्वालामुखीको सात किलोमिटर टाढा रहन सल्लाह दिएको छ ।
ज्वालामुखी विष्फोटपछि उद्धार टोलीले घटनास्थलबाट मानिसको शव निकालिरहेको देखिएको थियो । एएफपीका एक पत्रकारले माउन्ट लाकी–लाकी नजिकका पाँच गाउँ खाली गरिएको बताएका छन् । यसका साथै धुवाँको प्रभावबाट बच्न मास्क लगाउन सल्लाह दिइएको छ ।अक्टोबरदेखि लाकी हिमाल ४३ पटक विस्फोट भएको छ ।
